SUN世代：墨西哥美食燃起創業火
重新出發，需要莫大勇氣，少一點膽量也不行，但謝海發甘為夢想重新起步。曾是金融界驕子，於四大會計師事務所任職，兩年前他毅然放棄「錢」途，跳入飲食界由零開始。這位80後飲食業新丁，由洗廁所、下廚、訂貨、送外賣樣樣一腳踢，又親自飛往美國拜師學藝，為的只是一個夢：「由零開始創造屬於自己嘅嘢，係人生中最美好嘅事！」
謝海發生於普通家庭，父母於廟街開檔賣衣服，小時候的他已幫忙看檔做生意，漸漸萌生創業的念頭，「可能屋企人係做生意，我都有諗過創業，夢想建立屬於自己嘅嘢！」所以，他在大學選科時首選可令人「錢」程似錦的工商管理系。「好多人話會計前景好好，一定有工做，肯定餓唔死！」畢業後，他成功獲畢馬威會計師事務所聘用，入職一年多已有晉升機會，統領十多名職員衝鋒陷陣。
赴美拜師學藝
會計師前途無限，偏偏謝海發反其道而行，甘願放棄「錢」途：「我表現好，有機會升經理，以我成績再做落去，應該做到會計師樓嘅合夥人，不過呢啲都唔係真正屬於自己，就算畀你做到銀行大班又點，都係幫人打工。」為尋找心中理想，他在任職會計工作時，報讀法律課程為未來鋪路。
自此，謝海發的人生起了變化，站在法律界、會計界，還是創業三個路口中苦惱，「讀書同打工幾時都可以，但創業就要心中有團火！」正當他迷惘在三岔路口，朋友介紹他吃墨西哥菜，燒起他埋在內心的這團創業火：「一試難忘，好好味！香港好少墨西哥菜，所以我就揀咗做墨西哥餐廳。」
為求盡善盡美，他專程赴美拜師學藝，學習最正宗的墨西哥菜式：「雖然我仲返緊工，但我都請咗一個月假去學藝，一係唔做，一係做到最好、最正宗！」兩年前，年僅二十六歲的他，終於升呢做老闆，與朋友合資六十萬元，在鰂魚涌開設墨西哥餐廳。
因為沒有經驗，樣樣由零開始，開業初期洗廁所、下廚、訂貨、送外賣都一腳踢。「家人極力反對我創業，因為我唔做會計，就無咗份穩定收入，又唔知前景係點，不過我同家人講，畀兩年時間我尋夢。」結果，努力沒有白費，半年前他獲墨西哥領事館邀請籌辦國宴，「我開咗業一年半，又無名氣，但領事館竟然搵我哋做唯一食物嘅供應商，真係好大鼓勵，好有成功感！」
自籌辦國宴之後，餐廳漸為人認識，生意亦漸上軌道，還賺得第一桶金，上月更在中環開設分店，而謝海發更獲頒青年創業大獎。對於未來，他會繼續實現飲食夢，將墨西哥菜打入大中華巿場。
「我好欣賞『蘋果教主』喬布斯，佢都係由零開始創造屬於自己嘅王國，我會以佢做目標！」
謝海發感激好拍檔（左）陪他捱過所有難關，共同進退。（受訪者提供）
為了做最正宗的墨西哥菜，謝海發遠赴美國拜墨西哥人為師學藝。
謝海發獲頒滙豐青年創業家大獎，以表揚他努力創業的成就。