Executive日記
印度裔藝人喬寶寶喺筲箕灣東大街開咗間主打海南雞同咖喱飯嘅新店，自從呢個月一日開張後，聽聞生意唔錯，作為老闆之一嘅喬寶寶當然高興，佢噚日仲專登着咗一 身印度傳統民族服裝，現身新店接受印度傳媒訪問，但佢話，新舖嘅市場都係本地客，較少鄉里會嚟食，但印度報章就有興趣報道，佢點樣喺中國社會創出一番血 路！
呢間「千福大少」已經係佢第二間分店，另一間喺尖沙咀，喬寶寶話，都投資過百萬㗎，所以佢都好緊張生意額，佢噚日就 特登去到東大街，視察業務之餘，仲接受家鄉嘅報章訪問，佢一身打扮咁突出，當然吸引唔少街坊粉絲爭相同佢合照啦。佢話，自從新店開張後，人流都唔錯，而佢 都好信任啲夥計同大廚，因為合作開，加上舖頭全電腦化，都唔使佢憂心。不過，佢話有時食午飯時候，都會駕車落東大街，喺架車裏面望入店，睇下人流同夥計嘅 服務表現，但就唔會入舖，費事畀同事壓力喎，呢啲老闆真係識做！
