城市女生K：今日我同我大學同學Veronica飲咖啡，每次我哋都會呻職場是非，點知佢同我講佢已經遞左信辭職……
Dr.X：以我認識佢，應該唔係一個裸辭青年……Veronica平時去旅行都畫晒時間表，乜野都要有個後著，唔通佢真係頂唔順佢老闆？
城市女生K：係呀……半年前佢同我講佢有一腔熱誠入去呢間公司做event planning，望落成間公司好似好established，點知成個部門淨係得佢同佢老闆！佢老闆仲當佢係超人，有咩都叫佢做：寫sales proposal、見客、影場地相、買event物資……全都一手 包辦。
Dr.X：One man band聽落真係好辛苦，不過未嘗唔可以學到好多野！
城市女生K：最弊係佢成日摸唔到老闆想點，例如佢老闆試過同佢講咗一啲ideas，叫佢去籌備；Veronica好支持老闆睇法，按佢的ideas propose晒啲活動，老闆點晒頭認同； 但兩日後交proposal時，老闆又話：「無叫過你做呢d野喎，點解唔跟我個方法做呢？」搞到佢覺得成日估唔到老闆想點。
Dr.X：做野有時係咁㗎啦，老闆轉方向咪跟佢意思再做過！又或者可能喺落實ideas的過程，大家未傾得好仔細，老闆講個ideas出黎可能好簡單，但係實踐上又係另一回事！K，你喺大公司做過，又喺細公司打過工，你覺得邊度辛苦啲?
城市女生K：其實我覺得唔關公司大細問題，最重要係跟個點嘅老闆；好似Veronica 個老闆要佢廿四小時on call，最惡頂係凌晨追魂WhatsApp叫佢做野，簡直無晒私人空間，好似為左萬二蚊人工，賣咗條命俾佢咁！你話慘唔慘嘞，好似永遠無放工時間甘！俾著係你，你會唔會辭職？
Dr.X：今時今日因為資訊太過發達，令工作同生活條界線愈來愈模糊不清。或者我哋係時候諗下我哋要既work-life balance究竟係一個點樣嘅平衡，你prefer好一刀切咁樣話你收工唔要收老闆WhatsApp，同時你返工都唔好用/玩WhatsApp/Facebook/WeChat/Candy Crush/Pokémon間中輕鬆下；定係老闆跟下屬一齊開心見誠咁傾下大家覺得咩野ok，咩野唔ok，傾一個互動期望管理（interactive expectation management）（註1）？
城市女生K：咦，Veronica啱啱WhatsApp我……等我睇下佢仲有冇得轉軚！我唔想佢由一個地獄赤裸裸跳到另一個地獄！