23歲嘅「星之子」陳易希前年大膽創業，開咗間軟件公司Bull.B Tech，專攻Apps同網上平台設計，噚日佢出席活動時話，公司發展得唔錯喎！
「星之子」呢排忙緊兩項工程，一個係網站，專整電子優惠券同會員卡，方便大家唔使帶咁多嘢出街嘛！佢話已經花咗半年搞好啲保安，個QR code仲會間唔中自動更新?，唔驚被人盜用。
佢仲笑笑口話，有間公司同佢合作咗之後，facebook 粉絲兩個禮拜人數就已經double!
另一項係App嚟嘅，主要係為咗啲新人而設。 親友只要去到婚宴會場，scan吓個QR code，就會睇到新人嘅結婚相㗎啦！個App仲可以代替老土嘅簽名冊，親友可以即場自拍，再加句祝福語喺旁邊，就咁送畀新人留為紀念。佢仲話，個相簿冇容量限制可以任用㗎。
「星之子」話，嚟緊仲會着手搞好啲推廣，希望遲啲可以開拓內地同外國市場?！佢仲醒咗兩句格言畀各位想創業嘅後生仔：「最緊要唔好閉門造車， 要多啲同人分享自己嘅idea，唔好怕蝕底；因為好多時喺同人溝通嘅過程中，都會有啟發或者學到嘢。」
雨中踢波諷爛地波
多支英超球隊早前嚟香江比賽，點知大球場嘅草地變成大爛地，仲變咗國際笑話。反對亂用公帑嘅107動力噚日趁打風去咗大球場請願，仲扮成德成局長同康文署署長馮程淑儀(圖)，又喺球場外踢波，話要諷刺啲官將草地變泥地，情願喺石屎地踢波都唔用大球場喎。
佢哋建議香港球會集資自費起球場，由球會營運，好過畀政府管理。今次請願撞正「飛燕」嘅橫風橫雨，成員拉起橫額時個個都臉容扭曲！
毓民幫老友記開P
平時喺立會見到毓民，成日都係示威抗議，有時又掟吓嘢咁，仲有大大聲鬧官員同689，真係幾惡㗎！
成日整起個惡樣唔得嘅，原來毓民對住班老友記嗰時，就變咗個笑口棗咁，都唔知幾咁和藹可親！好似毓民早幾日幫大班老友記搞咗個生日會，仲開咗好多圍枱㗎。見到毓民係咁同班老友記吹水講笑(圖)，又送麵，就知毓民?到班老友記幾開心啦！